الناس هالكم الكبير الهائل الشيء الكثير

لا
نعلم من هم .. يخفون خلف ملامحهم
مسحة من الغموض
نعجز عن فهمهم
ولكني اكتب ما اتصور



الناس هالكم الكبير الهائل الشيء الكثير
أشخاص نعرفها باساميهـآ وأشيا هايفه


سطحية النظره لهم تغريك بالفهم المُثير
في عين غيري إجتماعات وأمم متكاتفه


تعقيد أكبر لو توغلنا على صدرك أ ُشير
تدرك بأنك واحد وداخل توجد طائفه


إذا ازدحم ماضي حياتك وأنت تدنو للمصير
دايم تحس بداخلك أشيا كثيره خايفه


وإذا فرشت لكبرياء الروح من فكرك حصير
تلقاك ويش أنته وتصغر في عيونك نايفه


أنا اتكلم عن مساحة فكري بركن السرير
ممكن تكون الفلسفه عندي قناعه تالفه


لكن تأكد أن روح الفقر في صدر الأمير
روح الشموخ بصدر من يبكي بدمعه أنفه


مشكلتي يصير بعيوني شيء لا يمكن يصير
وأشوفكم غيري وعادي هذآ شيء(ن) آلفه


ولمن سألت الروح قالت جملتين وفي الأخير
تلخبط الحكي وتقول أرجوك ماني عارفه


تقدر تشوف الورد... لكن تقدر تشوف العبير ...؟
يعني تبي تصدق لو أقلك كأني شايفه


كل ما أجي أبدأ كلامي عن متاهات المصير
يذوب تفكير وأحس بحلقي كلمه واقفه


أروح طفله تشكي الماضي ... على واقع مرير
لنّهـا وحيده ذنبهـا .. تنبذ بعيد مخـالفه


تزهين يا ذيك السحابه .. دون يكسيك الحرير
يصعد لها صافي البحر ماهي بيدها غارفه


أرواح فيها شر .. يجبرها على تجسيد خير
وأرواح فيها حب ... يصنع كلمتين (ن) زايفه


فيهـآ من التقوى كثير ... بس بحضور الوزير
تضيع دمعات التهجد ... مايصير تخالفه


مقننه في أقتران الشيء بالشيء النظير
وهي على هفوت تناقضها بعيني شارفه


الانصياع لشيء يعني فن تعذيب الضمير
إذا أنجبرت تسير الخطوه ورجلك حالفه


النهر يحكي إنكساره حس في صوت الخرير
وأنا إنكساري حس في صدري .. مشاعر واجفه


ماني بقاصد اسكن المثلى وأنا أنسان غير
واستطرد لقمة خيالاتي بقوه جارفه


خايف وأنا أ ُبدع تأمل أرجع لصدري وأ ٌشير
راجع كلامك يا فهد يمكن ما عندك سالفه